De excursión

Onte fomos de excursión a terras bergantiñáns. Deixamos a media mañán O Valiño para ir cara a Malpica, concretamente á praia de Barizo. O día non era nada do outro mundo, pero saiu algún que outro claro que nos permitiu pasar un bo rato na area.

A Catuxa xogou seguido co caldeiro e coa pá, e finalmente atreveuse a achegarse á auga. Non lle gustou nada a zona tranquila, a das pociñas entre as rochas. Así que fomos á parte das ondas, que rachaban con certa forza na beira, bastante máis que nas tranquilas praias de ría ás que está afeita a miñoca. O descobrimento foi interesante e xerou non poucas risadas, pero por pouco tempo: "aba fía". Efectivamente, xeaba, así que nos secamos un pouco e marchamos; xa era tempo de xantar.

Percorremos algúns quilómetros até Malpica, e entramos no ateigado Burato. Pasaba un bo anaco da hora de xantar da cativa, que andaba esfameada. Mentres esperábamos, á simpática parella catalá da mesa a carón nosa non lles quedou outra que darlle un pouco do seu arroz á Catuxa. Papouno en cuestión de segundos. Logo chegou a caldeirada de pescada, que tamén meteu entre peito e costas nun intre.

Un novo paseo pola praia de Malpica e aínda quedaron forzas para, xa de volta, un novo baño na piscina do xardín. Unha bonita xornada de excursión.